و أنا مالى

لما يجى يوم عليك تكون مستنى حد يطيبطب عليك و تبقى محتاجه فعلا و يخذلك .. اليوم اللى هو محتاجلك فيه بتلاقى نفسك غصب عنك مش مشفق عليه .. لكنك مش شمتان ... بس مش حاسس بيه
هو احساس مؤلم فى الحالتين .. بس ما باليد حيلة



أحبب حبيبك هوناً ما ، عسى أن يكون بغيضك يوماً ما ، وأبغض بغيضك هونا ما ، عسى أن يكون حبيبك يوماً ما

ششششششششش

لما تبقى عايز تكتب حاجة
و ماتعرفش
و ماتكتبش
غيركلام مابيتفهمش
تدور فى الكلام على معانى ماتقلتش
تدور ف قلوب الناس
او ف عيونهم
ماتلاقيهوش
بتحسه بس
مابيتكتبش

try again later,, toot toot toot

هابقى انانية لو قلت مش عايزة اسمع

كفاية اللى فيا و مكفينى

رجعت اكتب هذى تانى

مش عايزة اسمع كلام

ولا اقول كلام

شكل الحروف ع الورق بيهدينى

بيريحنى

بقيت بحب افضفض للورق .. أسهل

حمل تقيل جوايا

و قلمى حمال قسية

وورقى قلبه كبير

دايما بيحتوينى

مش عايزة حد يشكيلى

ولا يحكيلى على اللى مضايقه

ولا انا برضه عايزة اتلكم

محتاجة حاجة تانية مش عارفاها

عادى يعنى ..

زى مرات كتير عدت

افتقاد ... مكرر

كل يوم جديد ف حياتنا معرضين لفقد شىء .. أو شخص ..

فقده بالموت .. او افتقاده بالبعد .. و سواء البعد معنوى أو بعد فعلا مادى .. بنفس الوجع هو هو ..

ساعات أول ما الواحد يدخل ف علاقة او يتعرف على حد جديد .. سواء صاحب او حبيب .. و يحط احتمالات فشل العلاقة دى و نجاحها .. بيجط دايما ف باله فكرة فقده .. و يفضل مركز على الفكرة و حاطتها ف باله فترة .. لكن بعد وقت مش طويل بتتلاشى و تختفى الكلمة ...

و تنسى الشعور المؤلم ده .. و تنسى اخر مرة اتوجعت منه

بس بترجع تفتكر تانى و يعود الألم و بقوة اكتر .. لما بتفتقد حد جديد مرة تانية

ممكن

بما انى من الاشخاص المؤمنين بأن اسوأ حاجة فى الحياة ان مالهاش خلفية موسيقية .. فدائما ما احاول توفيق .. او تظبيط مزيكا معينة لمشهد معين من مشاهد الحياة اليومية .. حياتى انا ...


و بما انى برضه من المستمعين الدائمين لمنير .. و دايما بلاقى فى أغانيه مزيكتى لخلفية حياتى .. فمعظم الموسيقى التصورية لليوم بتفاصيله بتبقى منير .. و بيتخللها ساعات فيروز و سيلين ديون


اغنية منير .. "ممكن" .. بتناسب مشاهد كتيرة .. و انت فرحان او وانت زعلان .. ممكن

لو فرحان ... هاتسمعها و تبتسم .."اسكن بيوت الفرح .. آه ممكن" تفتكر الحاجات اللى كانت بتضايق "اسكن بيوت الحزن .. لااااااااااااا يمكن " و تبتسم برضه .. و تقول فعلا مش هاسكن بيوت الحزن تانى ابدا .. بتلاقى الدنيا لطيفة و انت بتسمع الأغنية و تقول على نفسك كنت اهبل لما كنت بتكتئب من حاجات عبيطة ز كان ممكن تعدى المواقف دى بسهولة جدا .. و تتهم نفسك انك شخص نكدى و مابتعرفش تدور على التفاصيل الصغيرة ف حياتك اللى تخليك مبسوط


و وانت زعلان .. بتستغرب .. هو ليه منير بيقول بكل ثقة " و مستحييييييل يا حزن راح تسكن " .. هو جاب الثقة دى كلها منين .. و ليه مستحيل .. مافيش حاجة اسمها مستحيل ... مسيرك تفرح و ترجع تحزن تانى .. و دوام الحال من المحال اصلا .. دى حتى الحياة تبقى تافهة اوى .. و تستلم للحزن مرة اخرى .. و تسمع الاغنية و تبتسم برضه .. بس الابتسامة المرة دى مش نابعة من الرضا .. هى ابتسامة عشان تدارى وراها دمعة مش عايز الناس تشوفها



ملحوظة : انا مش حزينة ..
ولا سعيدة ...
انا فى المود بتاع " ألا تتوقع شيء، وعندما يحدث شيء غير متوقع لا يثير فيك فرح أو شجن، فقط تعجب عابر تستمر بعده في كي ملابسك والتفكير في اليوم المسجى أمامك. أن تفقد المفاجآت والمتوقعات بريقها على حد سواء، فلا تستغرب المفاجأة ولا تستنكر المتوقع" بس كده

just a Note

Have u ever asked the radio to play a song for me? As I always do?
Ask him a question & let the song speaks of u?
U know something,, it always works ,, plays good songs whenever I call your name
Plays songs I love, or I wish u sing it one day for me
I know u r into music... but don’t know exactly your taste
The good signs are everywhere
I’m happy
But it’s just a fantasy, isn’t it?
I don’t know even why I’m writing this in English...
Do u have any clue ?!!

حد عايز يلعب معايا ؟؟

زمان لما كنت بابقى زهقانة و انا قاعدة لوحدى .. و جدتى مش بتعرف تلعب كوتشينة و ماما و بابا فى الشغل .. كنت باقعد على الارض و باتخيل حد بيلعب معايا .. و كنت بالعب معاه و بحاول دايما اكون حيادية .. ولا باجى على نفسى ولا باجى على نفسى .. ولكنى كنت باغش و اضحك على نفسى عشان انا اللى اكسب ...

دلوقتى لعبة الحياة .. برضه محتاجة اتنين يلعبوها .. و كتير بتخيل حد تانى معايا .. بس مش عارفة اعمل زى زمان و اقعد على الأرض و العب لوحدى .. محتاجة حد حقيقى يلعب معايا .. لعبة بجد .. لعبة الحياة و نكسب احنا الاتنين .. مش شرط حد فينا يكسب التانى .. احنا الاتنبن هانكسب فى النهاية

حد عايز يلعب معايا ؟؟

حراجى القط .. فتى أحلامى

مش عارفة ليه دايما لما الناس تحب تضرب مثال للرومانسية يقولوا روميو و جوليت .. او قيس و ليلى .. او ثنائيات كتيرة .. كلنا حافظينها

بس محدش ليه لاحظ رومانسية اتنين بيحبوا بعض أوى .. فى رأيى الشخصى تتمثل فيهم كلمة المودة و الحب

الاتنين دول حراجى القط .. و زوجتة المصونة و جوهرته المكنونة فاطنة احمد عبدالغفار

عارفه يا مرتي الراجل في الغربه يشبه إيه .. ؟

عود دره وحداني .. في غيط كمون ..

بحبهم اوى و دايما بتخيلهم .. بتخيل فاطنة و عزيزة و عيد ف محطة القطر و هم بيودعوه و هو رايح السد العالى .. لابسة ايه و بتتكلم ازاى ...

من يوم ما عنيكي يا فاطنه .. بلت شباك القطر

..لسوعتي بدمعك ضهر يديَ

و جوابتها اللى بتبعتهاله و ازاى بتقوله انه واحشها ..

في الليل يا حراجي تهف عليا ما عرف كيف

..هففان القهوه .. على صاحب الكيف ..

وبامد إيديا في الظلمه ألقاك جنبي

..طب والنبي صُح ومش باكدب يا حراجي

.وباحس معاك إن الدنيا لذيذه

و لما بتلومه انه بيتأخر عليها ..

النبي يا حراجي ما أطول قلبك

لاقطع بسناني الحته القاسيه فيه

و خوفها و قلقها على عيد انه مابقاش بيلعب مع صحابه بره الدار و خايف ليكون باباه سافر و بعد عنهم عشان زعلان منهم


وعزيزه وعيد

..من غيرك يا حراجي زي اليُتما في العيد

.الواد على صغره حاسس بالغربه والبعد

.ولا عاد حتى بيطلع يلعب في القمَارى مع الولِد

.اطلع وأخش .. أطلع وأخش القاه .. غيمان

وكأنه محروق له دكان .

ويقوللي : (( فين يامه أسوان .. ؟

وأبا سابنا ليه يا مه ؟ ما يمكن زعلان .. ؟ ))

اشتياقه ليها هو كمان ..

مشتاق ليكي شوق الأرض لبل الريق

..شوق الزعلان .. للنسمه .. لما الصدر يضيق

و لما كان فخور بيها و بالفطير بتاعها ..

ووصلنا فطيرك

..قعمزت ما بين الرجاله وكلناه

..يعني أنا دقته .. ؟

والنبي بعنيا قعدت أتفرج ع الرجال بياكلوه

كنا طالعين م الشغل نشر عرق

..بت يا فاطنه

..النبي في الدنيا .. ما فيه واحده بتسوى فطيره زيك ..

شفت ده في عنين الرجاله ..

وقلقه و حبه لولاده ..

وإوعي يا فطنه لما ارجع وأبص ف وش اللولاد ..

أعرف إن أبوهم كان غايب .

وإحنا هنا بنستنى الجوابات بفروغ صبر

طول ما الجوابات رايحه وجايه .

اعتبري كإني باجي أشوفك..واجى




يمكن حبيت حراجى و فاطنة عشان هما مننا .. شبهنا
مش روميو و جولييت اللى قتلوا نفسهم فى الاخر ولا قيس و ليلى اللى بيتكلموا بالفصحى ..
فى حاجة بحبها فى قصة الحب دى .. بس مش قادرة اوصفها .. بس بحس فيهم بالحياة

بالنسبة لى .. دى احلى قصة حب فى الدنيا

حالة كده و راحت لحالها

نفسى ف مرة اتكلم بجد

مع حد

يكون قلبه عليا بجد

من غير مجاملات

من غير كلاكيع

بجد بجد

نفسى اكلم حد

احكيله قد ايه انا تعبت

و يحكيلى

عمرى ما كنت انانية

و ماحبش خير لحد

نونس بعض و ندردش

لحد ما يطلع فجر

نقوم نتوضى و نصلى بجد

و دعا كتيير يطلع م القلب

نحمد ربنا و نترجاه

يخلينا قريبين من بعض

و نشكره

اننا لقينا نفسنا

صحاب بجد

يا رب

يارب

وحدك اللى عالم بقلبى و نيتى

و انت اللى عالم بكل شىء فيه

عالم بالكره و الحب

عالم بالجرح و الغلب

عالم بكل اللى ماليه

و ما له غيرك .. يارب

لى رب كبير

كل ما أرسى على بر
ألقانى تهت اكتر
ف نفس التوهة من تانى

و أقع و أقوم
يمكن التوهة عنوانى؟

طب يمكن لو نسيتها تنسانى ؟
يمكن لو رضيت بها ألقانى

هو انا هافضل كده كتير ؟؟
كل حاجة شاغلانى

نفسى ارجع زى زمان
و يبقى ولا شىء ف بالى

يا هم .. لى رب كبير