مش عارفة

لأول مرة من زمان أوى مش عارفة أكتب ولا عارفة أعبر عن اللى جوايا بالظبط ... كل يوم و فى نفس المعاد و بنفس الطقوس بمسك القلم و الورقة و ماعرفش اقول حاجة

بقيت بكتب كلام مالوش علاقة ببعضه ولا مفهوم .. و أنا عارفة ليه .. عشان فى حاجات عايزة اخبيها و مش عارفة .. و اللى عايزة اقوله مش بقوله بوضوح

بقيت حتى مش عارفة اكتب

..

فى حاجات من كتر ما احتجتلها مابقتش اعرف اتكلم عليها

..

اللى جوايا ماينفعش يتحكى ولا يتكتب .. يتحس بس

حالة برضه

عارف ..

عارف لما تيجى تضحك
و تحس انك مش عارف

عارف لما تيجى تبكى
و تفتكر الضحكة اللى ماعرفتش تضحكها
ولا حتى عرفت ترجع تبكى
و تصعب عليك نفسك

و تتوه بين الضحكة و الدمعة

حالة

هى حالة كده
بتاخد وقتها و تمر
زى البرد
مهما تاخد دوا مر
يومين تلاتة أو حتى اربعة
كله بيعدى
يوم حلو و يوم مر

أنواع الأيام

ايام بتعدى مانحس بوجودها ولا وجودنا ... دى جملة من أغنية اعز الناس بتاعت حليم ... بحبها جدا الاغنية دى ...

و افتكرتها و انا بافكر فى الايام .... الايام عامة .. و حياتنا

أيام مش عارفة راحت فين .. ضاعت منى غصبا عنى .. أغنية برضه فيها أيام بس ضاعت
يوم لييك و يوم عليك .. أغنية بتقول ان زى ما فى ايام فلة بيبقى فى أيام ما يعلم بيها إلا ربنا .. و كما تدين تدان و

الكلام اللى بالكوا فيه ده

أنواع الأيام كتير اوى ...

فى أيام مملة جداا و تحس ان الدقيقة بتفوت كأنها ساعات .. لما تبقى منتظر حاجة جدا و نفسك الوقت يمر بسرعة .. او كمان ممكن تحس بكده فى يوم مش وراك حاجة اطلاقا .. زى يوم اجازة و انت كل ايامك شغل و مشغول فى ميت الف كام مشورا كل يوم عايز تخلصهم .. وقتها بتكره الاجازة و اليوم اللى اخترعوا فيه كلمة راحة ولا عطلة رسمية

و أيام تانية .. سريييييييييييييعة جدااا .. لدرجة انك ممكن تسقط احنا يوم ايه و فى كام يوم يقعوا منك و تفتكر ان النهاردة التلات و يطلع الاربع اللى بعده بأسبوعين مثلا .. و تفتقد جدا ايام الاجازة و الراحة و تقعد تدور فى الاجندة عن الاجازات اللى جاية و ماتلاقيش ولا يوم اجازة قبل اكتوبر اللى جاى و علينا خير

و يوم تخاف منه .. زى يوم نتيجة الامتحانات .. و لا يوم رايح لدكتور .. ولا اليوم الاسود اللى انت بتحوش له القرش الابيض .. أيام من دى كتيير

و يوم تحبه لما تحقق حاجة انت بتحبها و تطلع النتيجة اللى كنت خايف منها و تنجح وتحس ان اهلك فخورين بيك..

يوم لما تلاقى اللى بتحبه .. يوم عيد ميلادك او عيد ميلاد حد قريب منك .. عيد الحب لو بتحب .. او رأس السنة لو بتحب الصورايخ و الكلام ده .. العيد الكبير و العيد الصغير ... و اعياد و احتفالات كتيرة حلوة بتلاقيها كل كام يوم بتيجى و بتنسينا قسوة الايام اللى كننا بنخاف منها

و ارجع و اقول .... وما الحياة إلا مجموعة من الايام بمختلف انواعها .. و لازم نعيشها بكل لحظة و كل ثانية و

مانضيعش اى يوم من غير مانفرح و نتلكك بحاجة تفرحنا... و يسعدنا ربنا جميعا و نعيش فى ايام فرحانة دايما ... قولوا أأأأاااااااممممممممممممممييييييييييييييييييييننننننننننننننننننننننن

نهايات الأشياء

كنت فى معرض الكتاب النهاردة و اتضايقت جداا .. انه النهاردة كان اخر يوم للمعرض فى اسكندرية و على موعد مع اللقاء السنة اللى جاية ان شاء الله .. مابحبش النهايات اطلاقا.. اكتر حاجة شد تنى النهاردة فى المعرض شكل الكتب و هو مصفوفة فوق بعضها استعدادا للرحيل... بحب دايما يوم الافتتاح و الكام يوم الزحمة اللى فى الاول

وقت الغروب نهاية اليوم و نهاية الشمس فى البحر .. مابحبش الوقت ده ... ببقى ف مود حزين و انا باتفرج على الشمس و هى بتغرق .. بحبها اكتر و هى بتشرق .. شعور فوق الرائع .. و فاكرة مرة شفتها على البحر .. تقريبا احلى ايام حياتى

بتضايق مع النهايات دايما .. اخر شوية لبن فى العلبة .. اخر باكتة شاى .. اخر معلقة بن فى البرتمان ... اخر حلقة لتمثلية .. اخر 5 دقايق من كل فيلم .. اخر صفحتين فى كتاب .. اخر محطة فى القطر او الترام و كل الناس بتنزل ... شعور مش لذيذ بالمرة .. بحب دايما البدايات اول صفحة من رواية عاجباك و مشتاق تقراها .. اول ما تفتح كيس بن طازة و تشم البن شوية .. اول محطة فى الترام و انت اول واحد تركب .. كده يعنى

اللى بيبقينى على قيد الحياة معرفتى بأن دايما بعد كل نهاية بداية جديدة و يارب مايحكم على حد بنهاية اى حاجة

ليلة شتا

مع انى بحب الشتا

بس النهاردة خايفة

نفسى أغمض عينى و أنام

لكنى مش حاسه بالدفا

واحشنى لدرجة مؤلمة

و ايه الجديد

ما انت على طول بعيد

بس ماعرفش ليه

كل ما اسمع الرعد ارتجف

و اشوف البرق اخاف

محتاجة أطمنك

و اطمن بيك

ف ليلة شتا ماخفتش ف عمرى قدها

احتياج ..

تراقب تزايد سرعتى فى تناول الطعام و احمرار وجنتى و قصبة أنفى بعين مشفقة..تستحثنى كى أخرج من صمتى , و تحاول ربط خيوط الكلام

يا عزيزى لا تحدثنى بالمنطق ..لا تحدثنى عن الاحتمالات و الأسباب و قوانين الطبيعة .....أنا مجروحة و أحتاج فقط لحضن كبير !!

غادة محمد محمود

من كتاب "اما هذه فرقصتى أنا"