Wednesday, January 28, 2009

بحبك


ليه ببقى مطمنة دايما و انت معايا
و ليه لما بتمشى كل حاجة بتبقى ناقصة حتة

بحبك و من كتر حبى بزهقك منى

لكن صدقنى
بحاول أحوش حبك يمكن فى يوم تضيع منى

بحبك و انت فرحان و فخور بيا
و لما بتزعل
بازعل من نفسى أكتر من زعلك منى

حبك غالى عليا و احلى هدية ربنا ادهالى
بحبك و انت معايا و وانت بعيد اكتر
طلعوا كدابين اللى بيقولوا البعيد عن العين بعيد عن القلب

وقلبى حب كتير .. بس حب من نوع تانى
حب انانى .. بينتهى دايما بالزعل أو الملل
بس حبك مع الزعل بيقوى
و حبى ليك و حبك ليا مع الايام بكبر
و من الايام بخاف اكتر
فى يوم مش هلاقيك فيه جمبى
نفسى اموت قبليه

صدقنى كل ده مش كلام انشا
انت اكتر حاجة حقيقية ف حياتى
بحبك لدرجة مش متخيلة الحياة من غيرك
ده اللى بيخلينى باعرف اعيش اننا بعد السفر بنتلاقى
بعد أيام أو اسابيع و أسابيع حتى

صحابك دايما بيقولولى انى شبهك بالمللى
و امى دايما تزعل منى لما ابقى ف صفك
تفتكر دايما اننا متفقين عليها
هى عارفة ان ملامحنا واحدة
لكنها بتتصدم دايما كل ما تلاقى طباعنا و احلامنا
هى كمان واحدة

بحبك و احب اللى يحبك
و ازعل اوى من اللى تزعل منه
وكتير كرهونى بسببك
و اكتر منهم حبونى عشان انا بنتك

Friday, January 23, 2009

وجهة نظر


كان ياما كان يا سعد يا اكرام( وفى أقوال أخرى .. يا سادة يا كرام) .. مايحلى الكلام إلا بذكر النبى عليه الصلاة و السلام .. يحكى أن ... لا على فكرة انا مش هاحكى حدوتة
ولا هاقول أى كلام له أدنى علاقة بالمقدمة دى


المهم .. و أنا قاعدة ازاكر .. و طبعا مايحلاش السرحان و انك ممكن تعمل اى حاجة فى الدنيا غير انك تزاكر .. ممكن تخلص روايتين و تقرا جرايد الاسبوعين اللى فاتوا كلهم و تتفرج على 14 فيلم و 18 مسلسل و تعمل كل حاجة و يبقى عندك وقت و تلاقيك نشيط .. أنما ساعة المزاكرة بتحصل حاجات عجيبة


وانا قاعدة ازاكر بقى افتكرت ورشة عمل كنت حضرتها من مدة عن التفاوض .. و كان الراجل اللى بيشرحلنا ده و مش عارفة بيسموه ايه .. طلعنى انا واوحدة زميلتى عشان نتفاوض فى موضوع و احاول انا او هى نقنع بعض بوجهة النظر عكس اللى بتقوله .. و كان الموضوع اللى قاله تعدد الزوجات .. قالى انتى مع تعدد الزوجات ولا لا .. قلتله معاه طبعا .. طبعا كل اللى كانوا قاعدين معانا ضحكوا و قالوا ايه البنت المجنونة دى .. و زميلتى دى طبعا مش مع تعدد الزوجات .. و قالى انتى بقى اقنعيها انها تبقى مش مع تعدد الزوجات .. و طبعا الموضوع كله قلب كوميدى جدا كالعادة معايا


المهم برضه .. بعد كل الوقت ده .. انا مع تعدد الزوجات مش ضده .. و عارفة ان كتير هايتهمونى بالجنون و التخلف .. و بالذات مناصرى حقوق المرأة


بافتكر جدتى زمان و هى بتحكيلى انا وماما حكايات قديمة عن قرايبها و ناس عرفتهم زمان من البلد .. و من الحواديت اللى انا فاكراها كويس حدوتة عن واحدة ست كانت متجوزة و مش فاكرة ليه جوزها اتجوز عليها واحدة تانية و الست الاولانية عشان بتحب جوزها و نفسه يبقى مبسوط صاحب الست التانية اللى بيقولوا عليها ضرتها .. و بقوا يروحوا السوق سوا و قسموا شغل البيت عليهم هما الاتنين و ولادهم بقوا صحاب و ياخدوا بالهم من بعض و يروحوا المدرسة سوا ولا يرحوا الغيط مع بعض .. و الحياة جميلة

من غير بقى دى ماتغير من دى .. ولا تقوله اعملنا جدول .. ولا ماتخليش ولادها يجوا حمب ولادى .. ولا ولادى لازم يروحوا مدارس احسن من ولادها .. و لازم يا حنفى تكتب البيت باسم ولادى و انا مش ضامنة الست الارشانة اللى انت متجوزها دى و الكلام البايخ ده


مش هاتكلم فى الشرع بقى و الدين و انه محلل للراجل المسلم انه يتجوز اربعة مش اتنين بس .. و اللى هايرد و يقول ماهو فى ضرورات عشان الراجل يتجوز واحدة تانية و العدل و المساواة و الكلام اللطيف ده كله


ولا الحاج متولى و الكوميديا اللى فى الموضوع .. بس ان جيتوا للحق هما لازم يحبوا بعض عشان يعرفوا يعيشوا و عشان ولادهم كلهم ابوهم واحد .. و ان كانت مسألة معقدة حبتين و مش سهلة على أى حد

انا باتكلم على الحب اللى بين الناس .. و على المسامحة و على كل شعور طيب جميل بين البشر .. و أكيد لو جوزى اتجوز عليا بعد عمر طويل لما اتجوز ان شاء الله يعنى .. انا اللى هاختارله العروسة .. او لو ماخترتهاش هاصاحبها و احبها .. و نتفق عليه و نقتله احنا الاتنين .. قصدى لا نحبه احنا الاتنين


الحياة ابسط و احلى من اننا نعيشها بغل او زعل من اى حد حتى لو كانت ضرتى

ومش ههازعل منكوا لو اتهمتونى بالجنون .. انا عارفة ان مخى فلسع من زمان

Sunday, January 4, 2009

اعتراف

عايزة أعترف بحاجة .. مش سهل عليا انى اعترف بيها
طول عمرى من و انا صغيرة بحسد أبويا على صحابه .. و كل مايمشى فى اى حتة سواء
فى النادى أو تحت البيت لو نزلنا نشترى حاجة ولا لو رحنا المنشية ولا محطة الرمل ولا حتى سيدى بشر ولا ركبنا العربية ولا حتى الترام .. إلا و لازم يقابل حد يعرفه و يسلم عليه و ياخده بالحضن و فينك يا راجل و فينك يا عم .. عنده صحاب كتيييير جدا .. و مع انهم قلو كتير عن زمان .. بس لسه اقدر اقول ان عنده صحاب كتير
كنت فى المدرسة زمان فى حضانة و ابتدائى علاقتى بكل الناس زمايل مش اكتر .. فى
الاوتوبيس الصبح .. و فى الفصل و فى البريك و لما باروح مكنتش بفتكر حد .. ولاحوارات هاتوا نمرة التليفون نرغى بقى و الكلام ده .. و لا حتى كنت اعرف معايا فى النادى ولا لا و نروح سوا يوم الجمعة و الحاجات دى
صحابى كانوا جدتى اللى بقضى معاها كل الايام و ابويا يوم السبت و ماما لما بتفضى من شغلها
لما كبرت و بقيت فى اعدادى و شفت بابا و صحابه و فهمت يعنى ايه صحاب .. و كان وقتها تعريف الصحاب .. انهم ناس لطاف بنقضى وقت جميل فى المدرسة سةا و نقعد جمب بعض فى الفصل و البريك بنبقى مع بعض برضه و يا سلام بقى لو كننا فى نفس الاوتوبيس كده نبقى انتيم جداا و يا سلام يا سلام لو تطورت علاقتنا و بقى معانا نمر تليفونات بعض عشان لو احتجت اسأل على حاجة فى الواجب ولا امتحان يكون عندنا تانى يوم و الشلة اللى كنت بحلم بيها برضه ماعملتهاش ولا حتى كان ليا عدد من الصحاب غير واحدة و ماكانتش معايا فى الاوتوبيس بس كان معايا نمرتها
مرحلة ثانوى بقى .. جالى احباط فى اول اولى ثانوى لأن مدرستى كانت اعدادى بس .. و نظرا لأن زى ماعرفتوا ماكنش فى صحاب .. ماباقاش فى حدمعايا فى مدرستى الجديدة .. و اكتشفت من وقتها انى معنديش مقومات الصديق الناجح .. لا عرفت اعمله فى اعدادى .. ولا بتوع ثانوى عرفت احافظ عليهم .. و كانت مواصفات الصديق ايامها حد ابن حلال كده ناخد الدروس سوا وماكنش عندى ثقافة الخروج و الاجتماعيات برضه .. و معرفش ليه .. وخلصت المرحلة
جينا للكلية .. و أول كلية رحتها و قعدت فيها سنتين .. ماعرفت بنى ادم فيها .. كنت زى ما بروح زى مابرجع البيت .. ده اصلا لو كنت نزلت من البيت عشان احضر حاجة فى المحاضرات
و ف تانى كلية .. قعدت تلات سنين برضه ماعرفش حد .. و اللى عرفتهم كانت معرفتهم بيا بالصدفة البحتة .. و معظمها علاقات عابرة أيام الدراسة و الامتحانات و تصوير محاضرات ..و بس على كده
مرحلة أدوار .. هى اللى اقدر اقول عليها نوعا ما بقى عندى صحاب .. أو تحديدا .. بقى ليا زمايل و زميلات و بقيت باعرف بشر .. الكلام ده ممكن يزعل ناس كتير منى .. و هايقولوا ماحنا كلنا صحابك .. و كلنا بنحبك
نفسى بقى اقول تعريف الصداقة اللى محتاجالها .. هو جميل انك تعرف ناس و الناس دى تحبك و انت تبادلهم الحب ده و نقضى وقت حلو مع بعض .. و نعمة من ربنا انك تبقى محبوب و يكون ليك شعبية بين صحابك .. و انا والحمدلله دى عندى .. حتى اللى مايعرفونيش كويس بيحبونى .. طب ما هى دى المشكلة .. انا اللى بيعرفنى كويس و يقرب منى اوى .. بيشوف فيا عيوب كتيرة .. مش زى ما هو واضح للناس
الصحاب بالمفهوم اللى بدور عليه .. .. مش عارفة اقول التعريف بالظبط بالكلام .. بس عارفين اللعبة بتاعت الثقة دى لما تبقى واقف و مدى حد ضهرك و ترمى نفسك عليه و يلحقك قبل ما تقع .. هو ده بالظبط اللى بدور عليه
انا و بدون مبالغة .. عمرى ماعرفت احافظ على بنى ادم بحبه و يفضل يحبنى بنفس الدرجة طول الوقت .. و ده مرض .. و اعترف بذلك .. و زى ماقلت .. مش سهل عليا انى اقول الكلام ده .. بس هى دى الحقيقة ..قريت كتاب كيف تكسب الاصدقاء و تؤثر فى الناس .. و حاولت اصلح من نفسى بس الظاهر مش نافع و ده مش اكتئابى المزمن .. لكن دى الحقيقة .. و اسألوا أى حد قرب منى اوى .. هايكون زعلان منى اوى ... و لو عرفتوا ايه الحل ابقوا قولولى عشان انا مش عارفة اعمل ايه