لاحظت ان اختلاط اللون الابيض للجبنة البيضة مع اللون الاحمر للطماطم ينتج عنه لون محبب إلى قلبى :)
لو حابب تعمل سندوتش :
المقادير :
عيش بلدى من أبو خمسة صاغ ده اللى الراجل عشان بيجيبهولنا لحد البيت بيبع ال15 بجنية أو يمكن أقل من 15 كمان
و جبنة بيضة على حسب رغبتك ( فيتا لطيفة .. و هاتعرف ليه لطيفة بعدين ... )
اهم حاجة بقى فى المقداير الطماطم ( و ده بديهى لأننا بنعمل جبنة بيضة بالطماطم)
الطمطماية لاااااااااااااااازم تكون ساقعة جدااااااااااااااا
الطريقة:
تسخن العيش اللى قلتلكوا عليه فوق ده
تجيب الجبنة و تغطى بيها العيش
(اه نسيت اقول حاجة مهمة .. ماتحاولش تفتح العيش و تعمله سندوتش اللى متعارف عليه ده .. انت كده هاتبوظ الموود العام للسندوتش ) انت تحط الجبنة عليه من فوق من غير ماتفتح و تقوم مطبقة نصيين
و انت بتحط الجبنة .. خليك مستمتع كده و انت ماسك السكينة او الشوكة يعنى و ارسم اشكال بالجبنة و مارس هوايتك كأنك نقاش بتبيض حيطة و تمعجنها و الكلام ده
المهم .. بعد العك اللى انت عملته ده .. هاتلاقى الجبنة ساحت .. تقوم واخد الطمطماية اللى سقعانة اوى دى و تخرطها ترانشات و تحطها على الجبنة كلها
بس يا حلو و تقوم مطبق السندوتش على بعضه و تبدأ تاكل
ملحوظة : لو هدومك مابقتش كلها جبنة بيضة و طماطم و بقعت يبقى انت أخفقت فى عمل السندوتش
ملحوظة2: لازم يبقى فى حد يشاركك فى الموود ده بجد .. مش لازم تاكل سندوتش الجبنة بالطماطم ده لوحدك .. هات ماما او بابا او حد من اخواتك أو صحابك .. ماينفعش تعدى الموقف ده من غير ماتلاقى حد يتريق علييك
و يبقى أحلى سندوتش تاكله ف حياتك
8 comments:
ربنا يستر عليه .. والله صعبان عليا رغم اني ما اعرفوش هو هايبقي مين .. بس صعبان عليا قوي
:PP
هههههههههه
اليط الطريقه الصحيحه لعمل الجبنه بالطاتطم
شوفي بقي المتعه في الطريقه دي
المقادير نفس ذات المقادير
بس زودي عليهم حبه زيت
اي نوع زيت دره عباد انا بفضل الدره
وممكن تستخدمي كمان زيت تنوين عشان بيبقي خلطه من الاتنين
شوفي ياستي .. ها تمسكي الجبنه وترميها في طبق صغيور ولازم يبقي صغير .. وتمسكي الطماطمايه وبالسكينه ما تخليهاش تتعرف علي نفسها اكبر حته فيها تبقي اصغر من الحبوب اللي جواها
العمليه عاوزه صبر
خلي بالك ان المتعه في دي
ماتمليش
بعد ما تخلصي هاتي الزيت ودلدقي من الازازه علي الجبنه
دلدقي اوعي تلتزمي بمقدار عين
الزيت ده هو اللي هاتتعبي مامتك في عسيله هدومه منه
بعد ما رميتي الجبنه في الطبق ودبحتي عليها الطماطم وغرقتيخهم زيت
غلاسه
اهرسيهم لو فيهم نفس
وبالهنا والشفا
المتعه هنا بقي في 3 حاجات
1 عصر الطماطم بالسكينه
2 الاستمتاع بالاكل وانت بتلفلفي لقمه العيش وايديك مغروسه في الطبق والزيت بيشرشر علي هدومك وانت بتاكلي
3 الخناقه اللي هاتحصل عشان بقعه الزيتمش بتطلع زي بقعه الطماطم
دى وصفة مختلفة .. ده لما تحب تغمس
انا كنت واضحة و قلت انه ده سندوتش :DD
مبحبش الجبنة الحادقة بالطماطم
باكل الطماطم بس
ههههههههههههههههههههههههههههه
خلاص جوعتينا
nawarto ya gama3a walahy :D
eshrabo shay tayeb ?!
جامد الموضوع ده
ممكن نضيف بعض قطع الخيار ولا الطبخة تبوظ؟؟؟
لا الخيار ده ف وصفة تانية :D
بس عشان خاطرك ممكن نضيف بعض قطع الخيار :)
معلش اسمحيلي - بصفتي عاشق للجبنة بطماطم - ... أحب أقولك ان المتعة الحقيقية هي انك تاكلي السندوتش لوحدك مش مع أي حد يعني
صباح الجوع
:)
Post a Comment