حد عايز يلعب معايا ؟؟

زمان لما كنت بابقى زهقانة و انا قاعدة لوحدى .. و جدتى مش بتعرف تلعب كوتشينة و ماما و بابا فى الشغل .. كنت باقعد على الارض و باتخيل حد بيلعب معايا .. و كنت بالعب معاه و بحاول دايما اكون حيادية .. ولا باجى على نفسى ولا باجى على نفسى .. ولكنى كنت باغش و اضحك على نفسى عشان انا اللى اكسب ...

دلوقتى لعبة الحياة .. برضه محتاجة اتنين يلعبوها .. و كتير بتخيل حد تانى معايا .. بس مش عارفة اعمل زى زمان و اقعد على الأرض و العب لوحدى .. محتاجة حد حقيقى يلعب معايا .. لعبة بجد .. لعبة الحياة و نكسب احنا الاتنين .. مش شرط حد فينا يكسب التانى .. احنا الاتنبن هانكسب فى النهاية

حد عايز يلعب معايا ؟؟

حراجى القط .. فتى أحلامى

مش عارفة ليه دايما لما الناس تحب تضرب مثال للرومانسية يقولوا روميو و جوليت .. او قيس و ليلى .. او ثنائيات كتيرة .. كلنا حافظينها

بس محدش ليه لاحظ رومانسية اتنين بيحبوا بعض أوى .. فى رأيى الشخصى تتمثل فيهم كلمة المودة و الحب

الاتنين دول حراجى القط .. و زوجتة المصونة و جوهرته المكنونة فاطنة احمد عبدالغفار

عارفه يا مرتي الراجل في الغربه يشبه إيه .. ؟

عود دره وحداني .. في غيط كمون ..

بحبهم اوى و دايما بتخيلهم .. بتخيل فاطنة و عزيزة و عيد ف محطة القطر و هم بيودعوه و هو رايح السد العالى .. لابسة ايه و بتتكلم ازاى ...

من يوم ما عنيكي يا فاطنه .. بلت شباك القطر

..لسوعتي بدمعك ضهر يديَ

و جوابتها اللى بتبعتهاله و ازاى بتقوله انه واحشها ..

في الليل يا حراجي تهف عليا ما عرف كيف

..هففان القهوه .. على صاحب الكيف ..

وبامد إيديا في الظلمه ألقاك جنبي

..طب والنبي صُح ومش باكدب يا حراجي

.وباحس معاك إن الدنيا لذيذه

و لما بتلومه انه بيتأخر عليها ..

النبي يا حراجي ما أطول قلبك

لاقطع بسناني الحته القاسيه فيه

و خوفها و قلقها على عيد انه مابقاش بيلعب مع صحابه بره الدار و خايف ليكون باباه سافر و بعد عنهم عشان زعلان منهم


وعزيزه وعيد

..من غيرك يا حراجي زي اليُتما في العيد

.الواد على صغره حاسس بالغربه والبعد

.ولا عاد حتى بيطلع يلعب في القمَارى مع الولِد

.اطلع وأخش .. أطلع وأخش القاه .. غيمان

وكأنه محروق له دكان .

ويقوللي : (( فين يامه أسوان .. ؟

وأبا سابنا ليه يا مه ؟ ما يمكن زعلان .. ؟ ))

اشتياقه ليها هو كمان ..

مشتاق ليكي شوق الأرض لبل الريق

..شوق الزعلان .. للنسمه .. لما الصدر يضيق

و لما كان فخور بيها و بالفطير بتاعها ..

ووصلنا فطيرك

..قعمزت ما بين الرجاله وكلناه

..يعني أنا دقته .. ؟

والنبي بعنيا قعدت أتفرج ع الرجال بياكلوه

كنا طالعين م الشغل نشر عرق

..بت يا فاطنه

..النبي في الدنيا .. ما فيه واحده بتسوى فطيره زيك ..

شفت ده في عنين الرجاله ..

وقلقه و حبه لولاده ..

وإوعي يا فطنه لما ارجع وأبص ف وش اللولاد ..

أعرف إن أبوهم كان غايب .

وإحنا هنا بنستنى الجوابات بفروغ صبر

طول ما الجوابات رايحه وجايه .

اعتبري كإني باجي أشوفك..واجى




يمكن حبيت حراجى و فاطنة عشان هما مننا .. شبهنا
مش روميو و جولييت اللى قتلوا نفسهم فى الاخر ولا قيس و ليلى اللى بيتكلموا بالفصحى ..
فى حاجة بحبها فى قصة الحب دى .. بس مش قادرة اوصفها .. بس بحس فيهم بالحياة

بالنسبة لى .. دى احلى قصة حب فى الدنيا

حالة كده و راحت لحالها

نفسى ف مرة اتكلم بجد

مع حد

يكون قلبه عليا بجد

من غير مجاملات

من غير كلاكيع

بجد بجد

نفسى اكلم حد

احكيله قد ايه انا تعبت

و يحكيلى

عمرى ما كنت انانية

و ماحبش خير لحد

نونس بعض و ندردش

لحد ما يطلع فجر

نقوم نتوضى و نصلى بجد

و دعا كتيير يطلع م القلب

نحمد ربنا و نترجاه

يخلينا قريبين من بعض

و نشكره

اننا لقينا نفسنا

صحاب بجد

يا رب

يارب

وحدك اللى عالم بقلبى و نيتى

و انت اللى عالم بكل شىء فيه

عالم بالكره و الحب

عالم بالجرح و الغلب

عالم بكل اللى ماليه

و ما له غيرك .. يارب

لى رب كبير

كل ما أرسى على بر
ألقانى تهت اكتر
ف نفس التوهة من تانى

و أقع و أقوم
يمكن التوهة عنوانى؟

طب يمكن لو نسيتها تنسانى ؟
يمكن لو رضيت بها ألقانى

هو انا هافضل كده كتير ؟؟
كل حاجة شاغلانى

نفسى ارجع زى زمان
و يبقى ولا شىء ف بالى

يا هم .. لى رب كبير

الرجل لا يساوى المرأة .. بالتأكيد

من غير مقدمات كتير او حتى قليلة .. انا مش ف صف الرجل ولا فى صف المراة .. أنا بس بحاول أفهم العلاقة .. بحاول أكون بره الصندوق و لكن لن أخفى تحيزى للمرأة بالتأكيد .. و هابقى بكدب اوى لو قلت انى هابقى محايدة

كان أنيس منصور قال زمان .. فيما معناه .. ان الست عشان تعرف تتعامل مع كل الرجال اللى على وجه الأرض ممكن تتعرف على واحد بس و هاتفهم عقليته و تفكيره و أسلوب حياته هاتعرف ان كل الرجال بيعملوا نفس الحاجات دى

إنما لو راجل اتعرف على بنات حوا كلهم .. عمره ما هايفهم أى ست عايزة ايه او يتوقع رد فعلها

و انا .. بصفتى المتواضعة .. أحب اقول .. ان العكس صحيح .. او على أقل تقدير الاتنين متشابهين لحد بعيد اوى

هو بصراحة كل الناس بقت قادرة و مفترية .. البنات و الستات عجبتهم حكاية حرية المراة و المساواة .. و الراجل مستمع بحكاية برضه انه مقهور بس من تحت لتحت بيمارس نفس ضغوطاته و تحكمات "سى السيد أحمد عبدالجواد " و الله يرحمه بقى نجيب محفوظ .. و يهدى كل مناصرى حقوق المراة

لو كل واحد رجع لطبيعته و عرف هو مخلوق لإيه .. الميزان هايرجع يتعدل تانى .. و لا الستات هاتبقى مجنونة ولا الرجالة مقهورة

سندوتش جبنة بيضة بالطماطم

لاحظت ان اختلاط اللون الابيض للجبنة البيضة مع اللون الاحمر للطماطم ينتج عنه لون محبب إلى قلبى :)
لو حابب تعمل سندوتش :
المقادير :
عيش بلدى من أبو خمسة صاغ ده اللى الراجل عشان بيجيبهولنا لحد البيت بيبع ال15 بجنية أو يمكن أقل من 15 كمان
و جبنة بيضة على حسب رغبتك ( فيتا لطيفة .. و هاتعرف ليه لطيفة بعدين ... )
اهم حاجة بقى فى المقداير الطماطم ( و ده بديهى لأننا بنعمل جبنة بيضة بالطماطم)
الطمطماية لاااااااااااااااازم تكون ساقعة جدااااااااااااااا
الطريقة:
تسخن العيش اللى قلتلكوا عليه فوق ده
تجيب الجبنة و تغطى بيها العيش
(اه نسيت اقول حاجة مهمة .. ماتحاولش تفتح العيش و تعمله سندوتش اللى متعارف عليه ده .. انت كده هاتبوظ الموود العام للسندوتش ) انت تحط الجبنة عليه من فوق من غير ماتفتح و تقوم مطبقة نصيين
و انت بتحط الجبنة .. خليك مستمتع كده و انت ماسك السكينة او الشوكة يعنى و ارسم اشكال بالجبنة و مارس هوايتك كأنك نقاش بتبيض حيطة و تمعجنها و الكلام ده
المهم .. بعد العك اللى انت عملته ده .. هاتلاقى الجبنة ساحت .. تقوم واخد الطمطماية اللى سقعانة اوى دى و تخرطها ترانشات و تحطها على الجبنة كلها
بس يا حلو و تقوم مطبق السندوتش على بعضه و تبدأ تاكل
ملحوظة : لو هدومك مابقتش كلها جبنة بيضة و طماطم و بقعت يبقى انت أخفقت فى عمل السندوتش
ملحوظة2: لازم يبقى فى حد يشاركك فى الموود ده بجد .. مش لازم تاكل سندوتش الجبنة بالطماطم ده لوحدك .. هات ماما او بابا او حد من اخواتك أو صحابك .. ماينفعش تعدى الموقف ده من غير ماتلاقى حد يتريق علييك
و يبقى أحلى سندوتش تاكله ف حياتك