سندوتش جبنة بيضة بالطماطم

لاحظت ان اختلاط اللون الابيض للجبنة البيضة مع اللون الاحمر للطماطم ينتج عنه لون محبب إلى قلبى :)
لو حابب تعمل سندوتش :
المقادير :
عيش بلدى من أبو خمسة صاغ ده اللى الراجل عشان بيجيبهولنا لحد البيت بيبع ال15 بجنية أو يمكن أقل من 15 كمان
و جبنة بيضة على حسب رغبتك ( فيتا لطيفة .. و هاتعرف ليه لطيفة بعدين ... )
اهم حاجة بقى فى المقداير الطماطم ( و ده بديهى لأننا بنعمل جبنة بيضة بالطماطم)
الطمطماية لاااااااااااااااازم تكون ساقعة جدااااااااااااااا
الطريقة:
تسخن العيش اللى قلتلكوا عليه فوق ده
تجيب الجبنة و تغطى بيها العيش
(اه نسيت اقول حاجة مهمة .. ماتحاولش تفتح العيش و تعمله سندوتش اللى متعارف عليه ده .. انت كده هاتبوظ الموود العام للسندوتش ) انت تحط الجبنة عليه من فوق من غير ماتفتح و تقوم مطبقة نصيين
و انت بتحط الجبنة .. خليك مستمتع كده و انت ماسك السكينة او الشوكة يعنى و ارسم اشكال بالجبنة و مارس هوايتك كأنك نقاش بتبيض حيطة و تمعجنها و الكلام ده
المهم .. بعد العك اللى انت عملته ده .. هاتلاقى الجبنة ساحت .. تقوم واخد الطمطماية اللى سقعانة اوى دى و تخرطها ترانشات و تحطها على الجبنة كلها
بس يا حلو و تقوم مطبق السندوتش على بعضه و تبدأ تاكل
ملحوظة : لو هدومك مابقتش كلها جبنة بيضة و طماطم و بقعت يبقى انت أخفقت فى عمل السندوتش
ملحوظة2: لازم يبقى فى حد يشاركك فى الموود ده بجد .. مش لازم تاكل سندوتش الجبنة بالطماطم ده لوحدك .. هات ماما او بابا او حد من اخواتك أو صحابك .. ماينفعش تعدى الموقف ده من غير ماتلاقى حد يتريق علييك
و يبقى أحلى سندوتش تاكله ف حياتك

يا رب

يارب

انت الاحن من كل القلوب

و انت العادل على كل ظالم

يارب

جيتك و أنا ضهرى مكسور

وبقدرتك و مشيئتك

هابنيه من تانى

بس يارب

وقف لى ولاد الحلال ف طريقى

زى ما أمى دايما بتدعيلك

يارب

مفتقداكى

أيام كتييييييرعدت

و حاجات كتييييييير حصلت

و هو هو نفسه روتين الحياة

البيت هو البيت

الشارع هو الشارع

كنت عايزة اقولها كام مرة عديت

بصيت على البلكونة يمكن حد يكون واقف

اشاورله

ولكن النهاردة مش زى كل مرة

هى اللى شافتنى

هى اللى جت

شفتها

ماعرفش ليه بكيت ف حضنها

كانت واحشانى

و كأن كل السنين اللى عدت

كانت ولا حاجة

مشيت معاها

و رغينا

قعدنا بدل الساعة تلاتة

كان نفسى احكى اكتر

كان نفسى اقولها على كل اللى مضايقنى

زى ما كنت باعمل زمان

كان نفسى احكيلها بالتفصيل

على كل يوم عدى و احنا متخاصمين

كنت عايزة اقولها برضه انى كنت بحلم بيها

كنت بحب دايما اسأل عليها واعرف اخبارها

بس غرورى منعنى

كنت عايزة اقولها وحشتينى

بس ماقلتهاش

كنت عايزة احكيلها كام حد حاول يصالحنا

و قلت لا

و كام حد زعل لفراقنا

ماعرفش ليه اتكلمت

و ماعرفش ليه وافقت امشى معاها

كنت محتاجلها

يمكن النهاردة بالذات

و يمكن كنت محتاجالها هى بالذات

معرفش

بس مبسوطة انى شفتها

و يارب اشوفها تانى

و اكون اتعلمت

بس نسيت اقولها انى اتغيرت

الأيام موتت حاجات فيا كتير

حاجات دلوقتى بحاول احييها من جديد

"واحشانى يا صاحبة روحى"

لخبطة

المكان : البيت .. على الكنبة اللى قدام التلفزيون
الزمان : بليل .. بعد يوم طويل .. مليان بحاجات كتير
الجو : الجو عادى .. زى الأيام دى من السنة .. أواخر الشتا .. دفا بس فيه لمسة برد تخليك محتاج لبطانية تحضنك و تدفيك و انت بتتفرج على التلفزيون
الموود العام : ولا أى حاجة .. بس فى رغبة فى البكاء ولكنى اقاومها ..
التلفزيون: مافيهوش أى حاجة مخليانى افضل ثابتة على أى قناة لمدة اكتر من 5 ثوانى .. لكنى لاقيت فيلم .. مش فاكراه .. بس فاكرة انى فضلت اتفرج عليه
و نمت..

أحلام كتيرة ف وقت قصير .. أحلام لو اتكتبت تعمل 100 سيناريو ل 100 فيلم
وأفكار كتير لو اتكتبت ..
و مشاريع لو اتنفذت ...
و أشخاص ..
و اماكن ..
و موسيقى و أغانى ..
الكلية ..
العيلة ..
الصحاب ..
الأهل ..
انا ..
فين ..
امتى ..
و مين ..
و ازاى ..
و ليه ..
النهاردة..
امبارح..
بكرة ..
الاسبوع اللى جاى ..
السنة اللى جاية ..
و من عشر سنين فاتوا ..
و العشر سنين اللى جايين ..
حب ..
غضب ..
كره ..
عنف و طيبة ..
ضعف ..
كبرياء ..
كرامة ..
....
....
....
....

صحيت فجأة .. اخدت البطانية و قمت لسريرى .. و حرمت أنام على الكنبة تانى قدام التلفزيون

,,,,,

بحب اتكلم معاكى دايما

و ده مش جديد

من زمان

بس الناس فاهمانا غلط

دايما بحب افضفض و ارغى معاكى

بس اللى بيزعلك منى

انى بحب دايما معانا ونس

ممكن استغنى بيكى عن كل الناس

لكن اوقات كتير بتبقى قاسية عليا

و مش بنعرف نتفاهم سوا

مش عارفة اللى احنا فيه ده صح ولا غلط

بس هو احتمال يكون جنون

مش عارفة

بس حتى لو كننا بنتخانق

و ساعات بتاخدينى ف حضنك

و نرجع نتصالح

دايما دايما

بحب أكلم نفسى

ان تكون اجرسففف

كنت من فترة ليست بقليلة كل ما أشوف حد من صحابى اسألهم .. ايه اللى اتغير فيا من يوم ماعرفتونى لحد دلوقتى .. و كتير جاوبونى اجابات نمطية و طبيعية فى مثل هذه الظروف ..

بس "أبو الحساسيم" صديقى قالى انتى بقيتى أجرسف .. أى عنيفة .. بس اللى هو مش ماشية اضرب الناس فى الشارع ولا اشتمهم او كسرت ايد حد ولا بمشى اكعبل كل اللى بعدى من جمبة بس بقيت قاسية على نفسى يمكن و بتعامل بمنطق غريب مع البشر اللى حواليا .. و تقريبا لحد دلوقتى مش فاهماه

انا النهاردة بس حسيت انى فعلا بقيت عنيفة .. محتاجة اضرب حد أو اشتم حد .. زهقت من كتر مانا طيبة و مابعرفش اشتم ولا أهزأ حد .. والله دى مأساة بكل المقاييس ..

نفسى لما حد يزعلنى اقوم لاطشاة بالألم على وشه ألففه حوالين نفسه ... او اشتمه بحيث يزعل اوى و اضايقه كده و بيقولك اتق شر الحليم اذا غضب .. هه

بس ساعات كده باعمل حاجات بترضى غرورى .. بقول كل اللى انا عايزاة فى الوقت المناسب و من غير خوف من انى اجرح حد .. المواقف ساعات بتستدعى انك تكون قاسى و معندكش دم

عشان كده فى ناس يا بتحبنى اوى يا بتكرهنى اوى .. عشان يا ببقى عسولة و طيوبة .. يا ببقى باتشتم و يتقال عليا كلام ربنا ما يورى حد

انا مش طيبة خلاص .. ولا عسولة .. ولا الكلام الفاضى ده

انا من هنا و رايح شريررررررررررررررررررة و اجرسففففففففف

حالة .... حلوة :D

كان أسبوع لطيف و أحلى حاجة فيه نهايته .. يومين ورا بعض شحنونى طاقة ايجابية و سعادة و تفاؤل و حاجات حلوة كتيير لأيام و أسابيع و يمكن شهور جاية كتيير
امبارح كان عيد ميلاد سيد درويش و كوم الدكة بقى و اغانى حيث الروح الحلوة و التفاؤل و الحماس .. و الحلوة دى قامت تعجن فى الفجرية .. و شد الحزام على وسطك غيره مايفيدك ...و الحركات دى
النهاردة بقى يوم عبقرى .. يوم جمعة و صاحية براحتى .. برضه بغض النظر عن انى بقالى يومين أجازة و بصحى براحتى إلا ان الصحيان متأخر يوم الجمعة حالة مختلفة جدا .. و المهم
مش هاحكى كتير عن تفاصيل اليوم بس هاحكى على أخر أربع ساعات ... أكيد باين من العنوان .. أو يمكن محدش خد باله ..... أنا رحت السيما النهاردة .. و ده حدث عادى بيتكرر بين الحين و الأخر ... بس اللى حدث غير عادى الفيلم اللى شفته واللى هو (واحد_صفر) .. بجد كاملة أبوذكرى دى طلعت ست جامدة جداا .. و كل الأبطال و كل الأحداث و الذى منه .. كله فيلم مالوش حل
رجعت بقى بالزاكرة لورا سنتين تقريبا من يومنا هذا .. و هو اليوم اللى بتدور فيه أحداث الفيلم العبقرى ده ..يوم الماتش النهائى بتاع كاس الأمم الأفريقية .. و اللى كتيرمن الناس تعرف أنه بيبقى دايما ليلة عيد ميلادى .. و صحابى قالولى انى وش السعد على مصر
على فكرة الناس كانت مصيفة فى الفيلم و أنا عيد ميلادى بيبقى برد دايما و الدنيا بتشتى
انا فاكرة اليوم ده و عمرى ما هانساه ابدا .. كان يوم تاريخى بجد .. مش هانسى ابدا أمى و هى بتقولى انا ولا هاممنى كورة و ولا بفهم فيها .. انا بس كنت بادعى ربنا ان المنتخب يكسب عشان انتى و صحابك تبقوا مبسوطين
اليوم ده على غير المعتاد قضيته بره البيت مع صحابى .. كان نفسى أخوض المغامرة جداا .. و كان نفسى مصر تكسب و اهيص ... و مش عارفة كل الحالة دى كانت عشان عيد ميلادى ولا عارفة ليه فجاة حبيت الكورة ..ولا ده رمز يمكن عشان حبى لبلدى اللى مش بلاقى أى صورة أعبر بيها عن حبى غير انى اشجع منتخبها
و فاكرة الجون الوحيد اللى جبناه يومها و فاكرة انى بكيت .. معرفش ليه ... و اوعى حد يقول عليا نكدية ... و فاكرة الأعلام ..و البيروسول اللى بيولع و العربيات اللى بتتشال بالناس اللى فيها ..
فاكرة جداا اسكندرية و كل الناس بره فى الشارع و على الكورنيش و فى شارع ابوقير و ف كل حتة .. كل زقاق و كل شارع ضيق و كل البلكونات و كل حتة كان فيها بشر .. و كلهم لابسين أحمر و اسود و أبيض
فاكرة انى روحت لحد بيتنا ماشية .. ووصلت البيت الساعة 12ونص .. و ده كان اليوم الوحيد اللى كنت فيه بره البيت لحد وقت متأخر كده .. و أبويا قالى .. هاعملك ايه يعنى .. خلفت بنت مجنونة ( محمد امبارح قالى مجنونة دى مش شتيمة)
بس برضه الفيلم ده ممتاز جداا جدااا جدااااا جدااااا
و ان شاء الله هابقى اعمل الفيلم بتاعى عن اليوم ده و هانافس كاملة أبوذكرى .. بس ولا هاجى جمبها حاجة .. بس كله على الله برضه

انا مبسوطة جداااااااااااااااااااااااااااااااااااااا
اللهم اجعله خييييييييييييييير